الثقب الاسود

[طبيبة اطفال]

بسم الله الرحمن الرحيم
السلام عليكم ورحمة الله وبركاته
وصل اللهم على نبينا محمد واله وصحبه الكرام وسلم تسليما كثيرا
​

في خبر مُنتشر إن امس علماء الفلك اتكلّموا عن حدث من أهم الأحداث في تاريخ العلم الحديث، ألا وهو تصوير ثقب أسود أو عشان أكون أكثر دقّة تصوير "أفق الحدث" لثقب أسود ولأول مرة هنقدر "نشوف" إيه طبيعة واحد من أكثر الأجسام الفلكية غموضًا في كوننا ..
.
أغلب الناس شافت فيلم Interstellar، وشافت التخيّل العظيم للثقب الأسود قُرب نص الفيلم وقد إيه شكله مُخيف ويملا الواحد رهبة من حجمه .. دلوقتي عايزك تعرف إن في في قلب مجرّتنا درب التبّاتة/اللّبانة وتقريبًا على بُعد حوالي ٢٦ ألف سنة ضوئية منّنا ناحية حدود كوكبة القوس والعقرب، بيتواجد ثُقب أسود عملاق زيّ دا وبيمتد لمسافة حوالي ٢٧ مليون ميل أو حوالي ٤٥.٤ مليون كيلومتر بالتقريب وبكتلة تُعادل حوالي ٤.٣ مليون مرة من كتلة شمسنا .. مسمّيينه Sgr A .. طب هو يعني إيه ثُقب أسود الأول ..؟
.
الثُقب الأسود هو مساحة من الفضاء الجاذبية فيها أكبر ما يُمكن، لدرجة إنها حرفيًا (بتشفُط) كل حاجة حواليها حتّى جزيئات الضوء نفسها مبتعرفش تهرب منها، وعادةّ بيتكوّن من إنهيار النجوم في نهاية دورة حياتها .. والثقوب السودا قديمة قِدم الكون نفسه بمّا إن النجوم موجودة من بداية عمر الكون .. طب البداية بتبقى منين ..؟ هقولك ..
.
دلوقتي النجوم بيبقى ليها جاذبية خاصّة بيها بتسحب ليها الأجسام المحيطة على حسب قوة الجاذبية دي، وبيبقى في قوة طرد مركزي بردو ودي الّي بتبقى نتيجة التفاعلات اللّي بتدور جوّا قلبها ومركزها، واللّي بيخلّي النجم عايش هو التناسب بين القوّتين دول فتلاقي دي بتسحب ودي بتطرد وهكذا في دورة حياة كاملة لحد ما النجم يخلّص كل المواد اللّي بيتكوّن منها في عمليات التفاعل دي، فميبقاش في قوة طرد مركزي تطرد الأجسام دي بعيد عنّه في نفس الوقت اللّي لسّه الجاذبية بتاعته شغّالة بتلاقي النجم بينهار على نفسه وبيتكوّن مكانه ثقب أسود عبارة عن منطقة جذب بس ومع الوقت حجمه بيكبر عن طريق إمتصاص الأجسام المحيطة ليه وإمتزاجه مع ثقوب سودا تانية قريبة وهكذا ..
.
طب إحنا قلنا فوق إن الثق الأسود بيمتص حتّى الضوء، دا هيفرق معانا في إيه .. ؟ هو إحنا فالطبيعي بنشوف إزّاي ..؟ الضوء من أي مصدر بينعكس على الجزء ويرتد منه لشبكية عينينا فنقدر نشوفه فلمّا الضوء نفسه مبيقدرش يهرب من الثقب الأسود دا، مش هينعكس لينا، ومش هيوصل لعنينيا فبالتالي مش هنشوفه أصلًا .. ودا سبب تسميته بالـ (الأسود) .. طب إحنا عرفنا إزّاي بوجوده طالما مش بنقدر نشوفه ..؟
.
الإجابة بسيطة .. زيّ ما عرفنا وجود الهوا، الأشعة تحت الحمراء أو فوق البنفسجية وغيرهم .. من تأثيره عالأجسام المُحيطة بيه .. وتأثير الثقب الأسود دا بيبان في جاذبيته الشديدة اللّي بتسحب عليها أي حاجة وكل حاجة .. والمسافة اللّي تأثيره بيمتد ليها بيتوّقف على عدّة عوامل، منها مقدار جاذبية مركزه ومساحته وهكذا .. طب دا معناه إن قوة سحبه دي بتضعف كل ما بنبعد عنّه .. دا صحيح بس في نقطة واحدة بس في المركز بيُطلق عليها Singularity والنقطة دي بتغطّيها منطقة أكبر منها شوية وقوة الجذب فيها هي أكبر ما يُمكن لدرجة إن الجسم اللّي هيقع فيها من عاشر المُستحيلات إنّه يهرب مهما كانت سرعته، لدرجة - زي ما قولنا فوق - إن الضوء نفسه اللّي هو اسرع حاجة في الكون مبيقدرش يهرب منها ..
.
المنطقة دي اسمها "أفق الحدث" أو Event Horizon ..
.
والاسم نفسه جه من فكرة إن المكان دا بالذّات لمّا أي (حدث) بيحدث فيه بيبقى داخل حدود الثقب الأسود حيث قوى الجذب عظيمة لدرجة إن مفيش أي نوع من أنواع المعلومات بتطلع منّه للرائي الخارجي لدرجة إنه مستحيل نعرف إذا كان في (حدث) أصلًا حصل جوّا ولا لأ .. والّلي عادّة بتاخد شكل دائري أو بيضاوي على حسب الثقب الأسود دا بيتحّرك ولا ثابت في مكانه ..
.
عايز أقولك - وركّز معايا هنا - إن من كتر ما الجاذبية دي عظيمة، فهي بتسبب إنحناء في الفضاء نفسه ناحية مركز الثق الأسود دا، وبالتالي الزمن نفسه بيبطأ في عين اللّي بيشوف من بعيد .. هفهمّك أكتر ..
.
تخيّل لو واحد لابس ساعة ف إيده وقلنا إنه هينطلق نحو مركز الثقب الأسود ودا على سبيل المثال بس عشان في الحقيقة دا مستحيل يحصل عشان الشخص دا هيتفرتك من تأثير الجاذبية عليه .. الشخص دا هيعدّي عادي من المركز بدون ما يلاحظ أي تغيير والوقت في ساعته هيمرّ عادي بالطريقة اللّي بيمرّ بيها في المعتاد ومش هيشوف أي حاجة مختلفة ولا هيعرف يفرّق أفق الحدث من أي منطقة تانية في الثقب الأسود نفسه من كتر ما كل حاجة سايحة على بعضها وظلام دامس .. في حين اللّي واقف بعيد عن الثقب الأسود دا هيشوف الشخص اللّي بيعبره دا بيبدأ يبطأ ويبطأ ويبطأ كل ما يقرّب من مركز الثقب لحد ما هيحسّ أن الشخص دا هياخد إلى ما لا نهاية عشان يعدّي لحد ما واحدة واحدة يختفي في الظلام .. ولو جاتله الفرصة إنه يبص على ساعة الشخص اللّي بيعدّي دا هيلاقيها بقت أبطأ وأبطأ من المتاد، يعني تكّة عقرب الثواني هتاخد وقت أطول من المعتاد عشات تتك ..
.
فكرة "إيه الموجود على الطرف التاني من الثقب الأسود" دي واكلة عقل العلماء من يوم إكتشاف وجودهم أصلًا، أنا واحد من الناس دايمًا بفكر والموضوع ساحلني معاه وبيخلّيني أسأل نفسي ..
يا ترى إيه اللّي في الناحية التانية ..؟
هل هتبقى مُجرّد "مقبرة كونية" ..؟
اللّي هو كل اللّي بيعدّي من الـ Singularity بيعدّي مسحوق حرفيًا فهيبقى في إيه هناك ..؟
هيبقى الطرف التاني دا "ثقب أبيض" ..؟ ما الثقب الأسود بيمتص حتى الضوء فأكيد بيطرده من الناحية التانية فطبيعي يبقى مضئ من هناك أكنّه شمس ..
طب هل الثقب الأسود دا بيعمل عمل "ثقب دودي" أو Wormhole وبيبقى ممر لأكوان تانية ..؟ اللّي هو أكواااان تانية غير معلومة لينا بالمرّة بنجومها وكواكبها قواعدها الفيزيئية وبالتالي بكائناتها إن وجدت ..؟
طب هل بيبقى ممر بيوفّر المسافة والزمن وبيوّصلنا لنقطة تانية من الكون بتاعنا ..؟ حاجة زي Shortcut كدة ..؟
.
أسئلة لسّه مش عارفين إجابة واضحة ليها .. وبما إنّك وصلت للنقطة دي وقريت كل اللّي فوق دا فأكيد قدرت تفهم إن حتّى لحظة قرائتك للسطور دي محدش يعرف شكل الثق الأسود ككل عامل إزاي، معندناش فكرة أفق الحدث دا شكله إيه بالظبط أو إيه بيحصل جوّا الثقب الأسود عمومًا ولا إجابة الأسئلة دي ..
.
الثقب اللّي قولتلك عليه فوق دا الّي اسمه Sgr A ..
.
عشان نقدر ندرسه بتفاصيله إحنا محتاجين لتليسكوب أفضل من تليسكوب هابل بحوالي ١٠٠٠ مرّة، ودا تقريبًا مستحيل عشان التكاليف والوقت والإمكانيات دا غير إن تليسكوب زي دا هينهار تحت ثقل وزنه نفسه ومش هنقدر نبنيه بالإمكانيات اللّي إحنا عايزينها دي، طب نعمل إيه ..؟
.
علماء الفلك جاتلهم فكرة عبقرية وبدأوا بالفعل في تنفيذها من أوائل ٢٠١٧، ألا وهي إنّنا بدل ما نعمل تليسكوب جديد كبير بالحجم المهول دا لأ إحنا هنستخدم ٨ مراصد موجودين بالفعل في دول مختلفة في أماكن مختلفة من كوكب الأرض زي مرصد في شيلي وواحد في أسبانيا وهاواي والمكسيك وأريزونا وهكذا وهنربطهم كلهم ببعض على هيئة شبكة عملاقة أكّننا موجّهين مراية تليسكوب عملاق بقّطر حوالي ١٠ آلاف كيلومتر ناحية الثقب الأسود دا تمتص كل حاجة جايةمن ناحيته وكل واحد فيهم هيشتغل بكامل قوّته في إنه يلقط ويحلل ويدرس بمساعدة الـ ٧ التانيين اللّي كل واحد فيهم متزامن مع التاني بدقّة متناهية وباستخدام ساعات ذرّية كلّها مربوطة ببعض وفي الآخر نجمّع كل البيانات مع بعض وهيبقى عندنا "صورة" واضحة للّي بيحصل فوق هناك بعيد ..
.
وبدأت الرحلة واتعمل التليسكوب اللّي سمّوه Event Horizon Telescope على اسم أفق الحدث اللّي هيدرسه ..
.
عايز أقولك إن مرصد من الـ ٨ دول موجود في منطقة Atacama قدر إنّه لوحده يسجّل بيانات لمّا حسبناها لقيناها حوالي بيتابايت يعني حوالي ١ مليون جيجابايت من البيانات والمعلومات عن الثقب الأسود دا .. كمية مهولة .. وتم إرسال الهاردات اللّي عليها البيانات دي لمرصد هايستاك في معهد مستشوستس للتكنولوچيا في الولايت المتحدّة ومعهد ماكس بلانك في بون بألمانيا .. الدنيا كانت ماشية كويس لحد ما قابلتنا مشكلة, إن أولى الصور والبيانات اللّي اتسجّلت كانت من مرصد من الـ ٨ دول في القارّة القطبية المتجمّدة، وبمّا إنّها كمية رهيبة من البيانات كان من المستحل إنّها تتبعت عبر الإنترنت ونظرًا لطبيعة القارة القطبية المتجمدّة دي فمكنش في رحلات طيران من وإلى هناك غير من نوفمبر إلى يناير بس فكان لازم نستنى .. وبالفعل البيانات وصلت لمرصد هايستاك بردو في ١٣ ديسمبر آخر السنة ٢٠١٧ .. وبكدة نستنى باقي المراصد ..
.
أول ما كل البيانات وصلت من الـ ٨ مراصد بدأ العمل عليهم بقى طول ٢٠١٨ من فريق متخصصّ من المحللين والخبراء مكوّن من ٢٠٠ شخص، بدأوا يدرسوا ويحلّلوا ويشتغلوا على البيانات دي عشان نطلع بصورة واضحة للّي بيحصل هناك .. والفكرة إن "الصورة" دي مش هتبقى صورة زي ما إحنا متخّيلين عشان إحنا - زي ما إتذفقنا فوق - مبنقدرش نشوف الثقب الأسود نفسه بس هنقدر نشوف إيه ..؟ الصورة دي هبتقى للظل بتاع الثقب الأسود دا .. يعني إيه ..؟ يعني الكون كلّه مليان جسيمات وعناصر "بتشع" أو "بتصدر أي نوع من انواع الطاقة" اللّي بتوصل لينا بنقدر نشوفها .. فلمّا الثقب الأسود دا يبقى قدّامهم إيه اللي هيحصل ..؟ هيمنع وصول الضوء بتاعهم لينا وهيرمي ظل واخد شكله على أجهزتنا فهنقدر نحدّد هو عامل إزّاي عن طريق ملايين الجيجابتس من البيانات اللّي قدرنا نسجّلها وندرسها على مر السنتين اللّي فاتوا ..
.
لو مش عارف تتخّيل إزّاي هنشوف ظل الثق الأسود دا، تخيّل إنت واقف في حتّة ضلمة في نص اللّيل، عربية واقفة قدّامك كشّافاتها منورة .. وجه شخص وقف قدّام الكشافات دي .. إنت مش شايف تفاصيله، مش شايف منّه حاجة، عشان هو اللّي بينك وبين مصدر الضوء .. بس في نفس الوقت قادر تمّيز إن في حد واقف، شايف طويل ولا قصيّر، رفيع ولا تخين، ثابت ولا بيتحرّك ولو حالفك الحظ، تقدر تشوف تفاصيل بسيطة من أطرافه اللّي ضوء الكشّاف منوّره .. اللّي هو طيفه أو السيلويت بتاعه في الضوء .. أحسن من مفيش صح .. ؟ هي دي الفكرة بالظبط ..
.
المؤتمر الصحفي للحدث هنا: https://tinyurl.com/y6lebl8x
والحدث نفسه لايف من هنا: https://tinyurl.com/yysgvg8d
اللقطة اللّي ظهر فيها الثقب الأسود في فيلم Interstellar هنا: https://tinyurl.com/pwommuj
.

الصورة التى نشرت بالمؤتمر للثقب الاسود




منقول للفائدة

 

[زهران]

النجم الثاقب

 

[عبد الله مجاهد]

السلام عليكم ...
هل فعلا النجم الثاقب ... هو الثقب الاسود ؟؟ هممم
الاثنين ثقب
ممكن

 

[طبيبة اطفال]

السلام عليكم ...
هل فعلا النجم الثاقب ... هو الثقب الاسود ؟؟ هممم
الاثنين ثقب
ممكن

وعليكم السلام ورحمة الله وبركاته

قد يكون هو النجم الثاقب ..يوجد علماء مسلمين يرجحون هذه الافتراضية
والله اعلى واعلم

 

[طبيبة اطفال]

السلام عليكم ورحمة الله وبركاته

وتستمر عظمة القرأن الكريم في التجلي
يخبرنا علماء الغرب اليوم حقيقة علمية وهي أن الثقوب السوداء تسير وتجري وتكنس كل ما تصادفه في طريقها، وقد جاء في إحدى الدراسات حديثاً عن الثقوب السوداء :
It creates an immense gravitational pull not unlike an invisible cosmic vacuum cleaner. As it moves, it sucks in all matter in its way — not even light can escape.
وهذا يعني:
إنها - أي الثقوب السوداء – تخلق قوة جاذبية هائلة تعمل مثل مكنسة كونية لا تُرى، عندما تتحرك تبتلع كل ما تصادفه في طريقها، حتى الضوء لا يستطيع الهروب منها.
وفي هذه الجملة نجد أن الكاتب اختصر حقيقة هذه الثقوب في ثلاثة أشياء:
1- هذه الأجسام لا تُرى: invisible
2- جاذبيتها فائقة تعمل مثل المكنسة: vacuum cleaner
3- تسير وتتحرك باستمرار: moves
وربما نعجب إذا علمنا أن هذا النص المنشور في عام 2006 قد جاء بشكل أكثر بلاغة ووضوحاً في كتاب منذ القرن السابع الميلادي!!! فقد اختصر القرآن كل ما قاله العلماء عن الثقوب السوداء بثلاث كلمات فقط!! يقول تعالى: (فَلَا أُقْسِمُ بِالْخُنَّسِ * الْجَوَارِ الْكُنَّسِ) [التكوير: 15-16]. ونحن في هذا النص أمام ثلاث حقائق عن مخلوقات أقسم الله بها وهي:
1- الْخُنَّسِ : أي التي تختفي ولا تُرى أبداً، وقد سمِّي الشيطان بالخناس لأنه لا يُرى من قبل بني آدم. وهذا ما يعبر عنه العلماء بكلمة invisible أي غير مرئي.
2- الْجَوَارِ: أي التي تجري وتتحرك بسرعات كبيرة. وهذا ما يعبر عنه العلماء بكلمة move أي تتحرك.
3- الْكُنَّسِ: أي التي تكنس وتبتلع كل ما تصادفه في طريقها. وهذا ما يعبر عنه العلماء بكلمة vacuum cleaner أي مكنسة

 

[الفيصل]

السلام عليكم ورحمة الله وبركاته

المؤلم والمحزن ان الأغلبية من المسلمين جلسوا يمجدون آينشتاين ويقولون عنه اعجوبه وغيره
شوفوهم كيف عظّموا قدرة المخلوق و تجاهلوا عَظَمة الخالق سبحانه وتعالى
​

 

[عبد الله مجاهد]

السلام عليكم ورحمة الله وبركاته

المؤلم والمحزن ان الأغلبية من المسلمين جلسوا يمجدون آينشتاين ويقولون عنه اعجوبه وغيره
شوفوهم كيف عظّموا قدرة المخلوق و تجاهلوا عَظَمة الخالق سبحانه وتعالى
​

السلام عليكم ....
عقل اينشتين نفسه دليل على عظمة الله عز وجل ...
فمن الذي خلق عقل و مخ اينشتين اساسا ؟؟؟؟
سبحان الله عما يصفون
المخ البشري نفسه دليل على عظمة الله

 

[ابو عدنان]

فوتوشوب..
اصلن كل ما تقدمه ناسا و تقوله
هوى كذب .وخزعبلات....و تدليس.