نوبات الغضب عند الاطفال

[طبيبة اطفال]

بسم الله الرحمن الرحيم
السلام عليكم ورحمة الله وبركاته

نوبات الغضب
المشهد الأول ماما في السوبر ماركت وليد طلب حلويات كتير ...ماما رفضت ...وليد رمي نفسه علي الأرض وبدأ يصرخ.....
المشهد التاني ماما في النادي ....مريم عايزة ماما تلعب معها ... ماما تعبت مريم بتصرخ و تضرب ماما .....ماما في قمة الاحراج و بتقرر انها ما تروحش النادي تاني...
أي مربي تعامل مع نوبات غضب الأطفال أو ما يسمي ب( tantrum ) في البيت في الناديأو عند الجدود....... تعتبر لبعض المربين من أكتر لحظات التربية ضغط و تحدي.....
النهاردة هنتكلم عن أسبابها , فهمها و التعامل معها بإيجابية...
نوبات الغضب سلوك طبيعي في سلوك الأطفال من سن سنة ونصف ل3 سنوات
أسبابها : إزدياد احتياجات الطفل لنموه مع عدم تطور اللغة وقدرته علي التعبير بصورة كافية ....
الطفل بيستخدم الصراخ , البكاء والغضب بصورة عامة للتعبير عن احباطه ( بتعملي حاجة هو رافضها ) أو للحصول علي اهتمامك ( ماما أنا هنا )...
التعامل الصحيح مع نوبات الغضب بيوقفها بسرعة و بيقلل احباطك أما التعامل الخطأ بيزيدها و بيخليها تستمر حتي بعد الفترة السنية الخاصة بها ( الطفل بيستخدها كأسلوب للضغط و الحصول علي احتياجاته )
اتعامل معها إزاي ؟!
1- تجاهلي الفعل و لا تتجاهلي الطفل
فكريه أنك مستنياه يبطل بكاء عشان نتكلم و أنت بتطبطبي عليه و امشي .
اتأكدي أنه في مكان امان عشان ما يعورش نفسه و إمشي و سيبيه .
ما تفضليش واقفة جانبه ( الرسالة الي بتوصله لما بتعمل كده هانتبه لك أكتر)
ارجعيله كل دقائق عدد سنه ( طفل سنه سنتين ارجع أفكره كل دقيقتين أنه محتاج يهدا عشان أفهمه )
انك بتطبطبي عليه بيفهم أنك بتحبيه لكن مش قابلة السلوك .
2- اتكلمي معه بصوت منخفض جدا ( لو زعقت هيقلدك و يزعق زيك , هتهدي هيهدأ زيك )
فهميه أنه يتكلم لو عايز حاجة ( استخدم الكلام ) ( عبر عايز إيه )
3- أبدا أبدا .......لا تعطيه ما يطلب لو بطل بكاء ( بطل يا حبيبي و أنا هاديلك الي انت عايزه )......بعد كده هيصرخ و يغضب و يبطل بكاء عشان ياخد الي عايزه .
4- التعزيز الإيجابي ........اول ما يعبر بالكلام و يطلب بطريقة مقبولة اعطيه الشئ الي طلبه ده اسمه التعزيزالإيجابي وهو الي بنستخدمه في العلاج السلوكي .....لما الطفل يعمل السلوك المطلوب تعويده عليه لازم تستجيبيله عشان يفهم أنه السلوك الناجح الكلام لا الصراخ والغضب و البكاء.
5- التشتيت ......لو الطفل استمر في البكاء 10-15 دقيقة مع التعامل الصح معه ( بتفكريه كل شوية أنه محتاج يهدأ و بتطبطبي علي و بتتكلمي بصوت منخفض )
ابدأي شتتيه بحاجة بيحبها ( لعبة , أغنية , أصوات مضحكة ) لأن ساعات الأطفال مش بيعرفوا يخرجوا من نوبة البكاء و حدهم ...
6- الاتفاقات .....من أهم الحاجات الي بتقلل نوبات الغضب و الضغط المصاحب لها ....
اتفقي معاه قبل ما تروحي السوبر ماركت هنجيب إيه من هناك ...لو طلب زيلدة فكريه باتفاقنا ..
اتفقي معه هنقعد أد إيه في النادي و عرفيه قبل ما الوقت ينتهى ب 10 دقايق ثم 5 دقايق..
- غالبا نوبات الغضب بتزيد في الأماكن العامة أو عند القرايب لأننا بنستجيب لها غالبا في الظروف دي و أولادنا بيكونوا فاهمين كده....
لو مش هتقدري تتصرفي صح مع نوبة الغضب في المواقف دي خدي بنتك أو ابنك وانسحبي.....
ثباتك في رد الفعل مع السلوك الي عايزة تعدليه هيضمنلك نجاح أسرع و رضا لك و أبناءك....
د. مي المشد