السلام عليكم ورحمة الله وبركاته
27/1/2013
حلمت خير يارب ان انا واولادي وجوزي عايشين في بلد علي بحر وماكنتش بافكر اننا في مصر خالص
وسبحان الله علي جمال المنظر مية زرقاء ورملة صفرا وشايفاها من فوق وكان حد بيصورها من طيارة
بس رغم دا كنت قلقانة وبصيت لقيت موجة رهيبة زي تسونامي كدا بس افظع واكبر وجاية من اطراف البلد والناس كلها بتجري وانا واخدة عيالي وباجري برضو المهم اننا فضلنا نجري وكل ا علي شواطئ البلد
وبعدين بدانا ندخل بين بيوت عشوائية زي اللي موجودة في كل مصر وناس بتهرب وعربيات شايلة ناس وبتهرب بيهم وبعدين بنتي الوسطي طلعت علي عربية من العربيات دي زعقت لها وقلت لها انزلي
لان العربية ماشية اتجاه المية ولقيت جوزي جنبي وفضلنا نجري نجري لقينا ولد او بنت مش فاكرة واقف في الشارع بيعيط و بعدين زوجي سأله انت فين اهلك لقينا واحدة ست مصرية ماشية قالت دا من امبارح وهو في الشارع كدا وعربية المدرسة سابته ومشيت ومش عارفين فين اهله بسبب اللي بيحصل في البلد
ساعتها عرفت اننا في مصر وبعدين جوزي قال للولد ما هي لو الحكومة الزبالة دي تمشي الدنيا هتتعدل ( واسفة في اللفظ بس هو دا اللي حصل) راح الولد رد عليه وقاله لا ماتقولش كدا الناس دي مش وحشة والمصريين مش وحشين ومش زبالة فزوجي سكت وكأنها كلمة خرجت غصب عنه وقت غضب
وقاله عندك حق وبعدين قلت له شيل ابني لانه صغير وانا كنت مساكاه في ايدي وباجري فبنجري بالراحة
قلت له شيله عشان نجري اسرع المهم فضلنا نجري لقينا نفسنا كل ما بنتقدم الشوارع بتضيق بتضيق بتضيق لحد ماوصلنا لشوارع ضيقة جدا يمكن ماتزيدش عن عرض السلالم اللي في البيوت
وفي مجري مائي في الارض وكل حارة من دول ليها بوابتين علي الجنب ولقيت الناس واقفة مش بتتحرك وخايفة وكأنها وصلت للنهاية او مكان مسدود بس انا كنت عنجي امل اننا نلاقي مخرج
فضلت اكمل لحد مالقيتنا وصلنا لحيطة مسدودة وكأن دي اخر البلد خلاص لقتني باقول من جوة قلبي
لا حول ولا قوة الا بالله ليس لها من دون الله كاشفة ورفعت ايدي ودعيت يارب نجيني انا وعيالي وجوزي
يارب اجعلها ماء رحمة لا ماء نقمة وقفت في جنب ومسكت عيالي وبقيت خايفة عليهم لما المية تيجي يغرقو بدأنا نسمع صوت المية بتقرب قلت لعيالي لما المية تيجي خدو نفس واقفلوا انفكم بايدكم
ولما تطلعوا علي المية خدو نفس تاني بس جوايا بقيت اقول مش هيعرفو يعملو حاجة وهيغرقو وبعدين شفنا المية داخلة علينا وانا بادعي لقيت المية جت عند المدخلين اللي في الشارع دا وراحت واقفة
مادخلتش الشارع اللي احنا فيه و زي مايكون علي المداخل دي بوابات زجاج مانعة المية
المهم انها واقفة وارتفاعها يادوب يوصل لكتف الناس الناس كلها استغربت من اللي حصل
واحد مد ايده جوة المية وكانه بيتأكد ان مافيش حاجة حيشاها ايده دخلت وبعدين راح داخل بجسمه
ودخل معاه واحد تاني وبعدين بدأ يدخل الناس وقالو اننا نقدر نخرج من هنا والمية مش عالية وكلنا هنمشي نعدي ندخل للبلد تاني
وبعدها صحيت مخضوضة
الحلم دا كان قبل الفجر
والحمد لله انا مستقرة في حياتي
و اصلي وابعد عن المحرمات
وانا مش في مصر
بس هارجع بعد 20 يوم
منقولة
السلام عليكم ورحمة الله وبركاته
التعديل الأخير بواسطة المشرف: