- إنضم
- 10 سبتمبر 2013
- المشاركات
- 1,841
- التفاعل
- 8,804
- النقاط
- 122
بسم الله الرحمن الرحيم
السلام عليكم ورحمة الله وبركاته
وصل اللهم على نبينا محمد واله وصحبه الكرام وسلم تسليما كثيرا
موضوع النهاردة مهم جداجدا، عن الحساسية المفرطة، يعني ايه؟ نتعرف عليها ازاي؟ ازاي نمنع تكرارها وازاي نعالجها؟السلام عليكم ورحمة الله وبركاته
وصل اللهم على نبينا محمد واله وصحبه الكرام وسلم تسليما كثيرا
كل دي أسئلة لازم نكون عارفين اجاباتها كويس لأن كلنا معرضين للحساسية المفرطة (حتى الناس اللي عمر ما جالها حساسية قبل كده) ولأنها للأسف من أسباب الوفاة السريعة.
حساسية مفرطة يعني حساسية شديدة جدا بتستهلك الخلايا المناعية وبتفرز مواد كيميائية ممكن تسبب هبوط حاد في ضغط الدم وبالتالي للوفاة لا قدر الله. والشخص بيحس ان فعلا روحه بتتسحب وانه خلاص بيموت. من رحمة ربنا ان ٩٠٪ من الحالات بتتحسن لوحدها.
نعرفها ازاي؟ وتفرق ايه عن أي حساسية؟
الموضوع بسيط، ركزوا معايا.. عندنا سيناريو من ثلاثة :
حساسية جلد (احمرار، هرش شديد، ارتيكاريا، تورم في العين او الشفاه.... الخ) + إما أعراض تنفسية (كحة شديدة، اختناق، وجع في الصدر، صعوبة في التنفس، تزييف في الصدر... الخ) أو دوخة/ صداع وعدم اتزان/ هبوط في ضغط الدم/ إغماء.
شخص أتعرض لواحد من مسببات الحساسية من غير ما يعرف، وبعدها بدقايق او ساعات توصل إلى ٦ ساعات حصل ٢ من ال ٤ حاجات اللي هنقولهم:
اعراض جلدية أعراض تنفسية هبوط في ضغط الدم مغص شديد /قيء
شخص يكون عارف ان عنده حساسية من حاجة معينة ويتعرض لها وبعد كده يحس بدوخة شديدة وهبوط في ضغط الدم.
هي دي الاحتمالات الثلاثة اللي تشخص بيها حساسية مفرطة.
نتصرف ازاي لما يحصل حساسية مفرطة؟
عايزين نحفظ الخطوات دي صم
١- نبعد الطفل عن سبب الحساسية بسرعة
٢- نتأكد من النبض
٣- بسرعة ينام راسه تحت ورجليه مرفوعة وما يتحركش خالص غير لما الضغط والنبض يستقروا
٤- ياخد ادرينالين عضل في الفخذ بسرعة جدا، الجرعة لازم تكون محسوبة وجاهزة، عن طريق دكتور الحساسية المتخصص. وممكن الطفل يحتاج اكتر من جرعة بينهم على الأقل ٥ دقايق.. الادرينالين لازم يكون موجود في البيت وفي كل مكان الطفل بيروحه لو سبق وحصل له حساسية مفرطة. الجرعة لابد من وصفها عن طريق طبيب ..
يا دكتورة ما احنا علطول بنروح الصيدلية والصيدلي بيدي الولد حقنة كورتيزون.. الكلام ده احنا اول مرة نسمعه
الكورتيزون بيبدأ يشتغل بعد ساعتين. وما بيقدرش يرفع ضغط الدم بسرعة واللي هو اصلا سبب الوفاة في الحالات دي... جرعة الادرينالين بتكون قليلة ولكنها تنقذ الحياة..
حساسية مفرطة= ادرينالين عضل
ازاي نمنع تكرار حدوث الحساسية المفرطة؟
نروح لمتخصص في أمراض الحساسية علشان هو الوحيد اللي بيعرف ياخد تاريخ مرضي مفصل يعرف من خلاله مسببات الحساسية لكل مريض، ويختار التحاليل المناسبة لحالة كل طفل للتأكد من سبب الحساسية والتعامل معاه.
الأطفال اللي معروف ان عندهم حساسية من حاجة معينة، ما ينفعش يتعرضوا ليها خالص
مسببات الحساسية عايشة معانا واحنا كمان عايشين معاها، ممكن تكون انواع اكل، وممكن تكون اتربة او نباتات او أعشاب، وممكن تكون حيوانات او طيور، وممكن تكون أدوية، والاخطر انها تكون قرص نحل او دبور او لدغ عقرب او ثعبان، وممكن تكون بسبب عوامل نفسية او إجهاد او التعرض للشمس، أو الحر او العرق او الاهتزازات.
٢٥٪من الحالات مش معروف سببها.
حساسية مفرطة = ادرينالين عضل
حساسية مفرطة = معانا action plan نتصرف ازاي
حساسية مفرطة= التوجه لمتخصص لمعرفة سبب الحساسية
الحساسية المفرطة بتحصل لأي حد في أي سن.
أولادنا أمانة، عايزين نحافظ عليها
ربنا يعافي اولادنا جميعا وسائر اولاد المسلمين