تقوية الذاكرة

[طبيبة اطفال]

السلام علبكم ورحمة الله وبركاته
اللهم صل وسلم وبارك على نبينا محمد وعلى اله وصحبه أجمعين...
طبعا معظمنا بيعاني من مشكلة قلة التركيز والنسيان وانشغال العقل المستمر بأمور الحياه اللي بيرهقنا جدا في بعض الأوقات و بيستنفذ طاقتنا بلا طائل . لكن أبشروا دايما فيه حل لكل مشكلة.
زي ما التمارين بتقوي العضلات وتخليها تشيل اوزان أعلى برضوه التمارين بتقوي عقلنا وتخليه أقدر على التعامل مع ملايين المعلومات اللي بيتعرضلها كل يوم . اتبعوا النصائح دي وأكيد هتحسوا بتقدم كبير.

1_ زود مدة تركيزك بالتدريج
لو انت من الناس اللي متقدرش تركز اكتر من دقيقة عموما فأنت كل يوم هتبدأ تتمرن انك تزود مدة تركيزك تدريجيا مع الاستراحات يعني دقيقتين تركيز بعديهم دقيقة استراحة يوصلوا ل 5 تركيز و دقيقتين استراحة وصلتهم ل 10 تركيز يبقى 4 دقايق استراحة وهكذا لغاية ما توصل ل 45 دقيقة تركيز متواصل وبعديها 15 دقيقة استراحة . طب ايه الأنشطة اللي ممكن اتدرب فيها؟ القراية, الكتابة , المذاكرة او سماع محاضرة او ايا كانت المهام المطلوبة منك عموما تقدر تتدرب في كل أنواع الأنشطة اللي بتمارسها .

2_ اكتب قائمة بالحاجات اللي بتشتت انتباهك
فلنفترض انك بتذاكر او بتشتغل او قاعد على كورس طبعا عقلك مش هيسيبك كدة تركز في سلام هتبص تلاقي 5000 حاجة جابها دماغك عشان تعملها زي " ما تشوف مين عمالك لايك على اخر بوست , طب شوف يمكن الشركة بعتت الايميل , طب ما تتصل بصاحبك عشان الخروجة , طب اروح اجيب حاجة من التلاجة , ولا اعمل حاجة سخنة اشربها وووووو …. إلخ " لو استجبت لدماغك مش هتخلص حاجة اومال تعمل ايه ؟ هتجيب ورقة وقلم وكل اما حاجة تيجي في دماغك تكتبها على جنب وتكمل في مهمتك الأساسية وفي الإستراحة هتقرأ الورقة وتروح تعمل كل الحاجات دي. وبأي حال من الأحوال متقمش أبدا قبل ما التايمر بتاع مدة التركيز يرن.

3_ خليك فضولي دايما
الفضول وقود الإنتباه والتركيز . طب ازاي تحافظ على فضولك اطول مدة ممكنة من غير ما تفقد الاهتمام بسرعة؟ بإنك تسأل نفسك كتير. يعني انت لو في محاضرة مثلا وحسيت إنك مليت ومش مركز, إسأل نفسك هو اللي بيتكلم فيه مهم؟ طب يعني ايه المصطلح اللي هو قاله دة؟ طب انا استفيد من الكلام دة ازاي في حياتي ؟ وبكدة هتخلي دماغك في الموضوع ومركزة عشان تجاوبك على أسئلتك لأطول فترة ممكنة.

4_ اتمرن على التركيز الكامل خلال اليوم
يعني ايه؟ يعني وانت بتاكل كدة حاول تركز في طعم الأكل ركز وانت بتمضغ الأكل وبتبلعه كدة بالراحة حلل النكهات اللي انت بتتذوقها وحس بيها . راقب الأمور حواليك بهدوء وركز في تفاصيل الحاجات اللي بتعملها في حياتك من وقت للتاني دة تدريب رائع جدا وهيعود دماغك على تركيز دقيق وطويل في اي حاجة هتعملها بعد كدة.

5_ متنساش تمارين الجسم
زي ما طول عمرنا بنسمع العقل السليم في الجسم السليم والدراسات أثبتت مش بس صحة الكلام دة لا وضرورته كمان . يعني عقلك مش هيشتغل بكامل طاقته الا لو مارست التمارين الرياضية بإنتظام .

6_قوى الذاكرة
والحقيقة دة موضوع تاني لوحده وليه مقالات خاصة بيه لكن من غير ذاكرة مفيش تركيز وانتباه ولا تعلم فكان لازم نذكره هنا. حاول دايما تخلي ذاكرتك قوية هات ابيات شعر وإحفظها . هات أيات القرءان وإحفظها ذاكر الرموز االصينية وشوف هتفتكر اد ايه منها . وخلي دة روتين ليك كل اسبوع تعمله على الأقل . الذاكرة دي هي اللي بيعتمد عليها عمليات المخ كلها فحاول دايما انك تحافظ على قوة ذاكرتك ماحييت.

7_التأمل والصلاة
الدراسات أثبتت ان الناس اللي بتمارس التأمل في حياتها تركيزها بيبقى ضعف الناس اللي مبتمارسهوش والحقيقة التأمل هو شىء احنا مطالبين بيه في أديانا ومننساش ان الرسل والأنبياء تلقوا رسالتهم والوحي نزل على رسولنا الكريم أثناء التأمل في الغار . وبالنسبة للصلاة فأنصحكوا تشوفوا حلقة خواطر عن الصلاة لما قاسوا الطاقة المنبعثة من الجسم قبل وبعد الصلاة وأد ايه كان الفرق كبير حيث أن الطاقة توازنت وتضاعفت بعد الصلاة .
أتمنى لكم حياة مليئة بالفضول والمتعة والشغف ..
علم ينتفع به
وفقكم الله للخير كله